أحداث اليوم 12 نوفمبر 2010

 

السلام عليكم و رحمة الله و بركاته

 

اليوم مرت علي وايد اشياء او مواقف و مشاعر , فقلت اكتبها لمجرد اني ابي اشارك فيها احد

 

1-

 

رحت الكلية و حدي ميته ملل بالمحاضرة , الدكتور تكلم عن الامتحان و الاجابات النموذجية , طلعت الاجابات النموذجية

تعجيزية و مو نموذجية ,, الله يعين

 

قالنا بعد المحاضرة تلقون الامتحانات عند السكرتير و انا بروح اجتماع

 

بس خلصنا و كانت المحاضرة عن بُعد ( أي أن الدكتور غير متواجد أمامنا و لكن هناك شاشة تنقل لنا المحاضرة التي تُقام في مبنى الطلاب )

فجأة 4 بنات تشوفونهم يركضون بالممرات و على الدري (الدرج) و بالحديقة ركض مهذب و داخل مبنى الدكاترة

 

و مع ذلك قدر الدكتور يوصل لمكتبه و يروح الاجتماع قبل لا نوصله , شفنا الدرجات و انصدمنا , اقل درجة بحياتي

 

انصدمت و ضاق خلقي و عصبت و كتبت بتويتر و الفيس بوك و دعيت له الله يهديه و يعطينا بونص ولا يراعينا بالدرجات

 

 

سبب التدوين :* شعور جميل الركض بالكلية

*حسيت ان مهما نكبر بنشتاق لفعل عفوي نسويه

*اجتهد اكثر

* في دكاترة مزاجيين

*الدعوه للدكتور فيها مصلحة اكثر من الدعوه عليه

 

2-

 

رفيجتي اتصلت علي و قالت لي انها راحت جرير و كنت تقريباً بسابع نومه و انا اكلمها , و على بالي حلم :p

 

يوم قعدت من النوم امي قالت لي وين بتروحين ؟ قلت لها ابي قيصر الي بحولي بارك

 

و رحنا حولي بارك

 

طبعاً دخلت جرير و قالت لي امي يلا عاد شريتي وايد كتب لا تشترين بس شوفي

 

و تجولت بين أرفف الكتب و اطلع على جديد الكتب و الأكثر مبيعاً , و تقريباً مريت بكل الممرات و ما عجبني شي إلى الآن

 

او ان وقته اشتريه الحين الحين

 

و قلت خلاص انا بعد شوي ان شاء الله برجع البيت و اكتب بالفيس بوك و تويتر " أنا فخورة بنفسي اليوم دخلت جرير و طلعت

 

و ما شريت و لا كتاب ! " , ما مداني قلت الفكرة ببالي الا و رحت للرف الأخير و يعجبوني 3 كتب واحد منهم اذكر ان

 

في أحد مدحه بالجود ريدز و شريت كتاب رابع بالطريج من صوب الكتب الي عليها تخفضيات

 

الكتب الي شريتهم

1- 2002 طريقة لتسعد نفسك

2-611 طريقة لتقدير الذات

3-100 طريقة لتحفيز نفسك

4-الرسائل السلفية في إحياء سنة خير البرية

 

و اكتشفت اني ما اقدر اقاوم شي اسمه كتاب

 

3-

 

لا زلنا في حولي بارك , صبيان يهالو طولي <- احم لا تسألون عن طولي

 

بس يعني انا طول صبيان اعمارهم 13-14 سنة

 

يعني شكله  قبل سنتين كان بالابتدائي هذا اذا ما كان عايد جم سنة و ليلحين بالابتدائي

 

يدخن و يغازل ! ؟؟؟؟ خيــــــــــــرررر واااااي يغثوني يغثوني ! الله يهديهم و يصلحهم يا رب

 

بس احس هالعمر وايد مبجر على تدمير الذات من خلال التدخين , او تدمير حياة البنات من خلال المغازل

 

او يضر عمره انه يدخل بالمحرمات و العياذ بالله و هو أول سنين التكليف !

 

4-

 

مر من يمنا الحنطور

 

( عربة يجرها حصان )

 

و امي تقول مسكين باااااائس الحصان , جان اقولها اكييد يعني و اييه اكتئاب بعد

 

ما كان يحارب و بكل معركة هو المهم صار بمدينة ملاهي يركب يهال و يروح مسافة جم متر طول اليوم رايح راد

 

ما راح استغرب اذا بيوم قالوا ان الحصن بمدن الملاهي بدت تنتحر

 

5-

كنت في دورة المياه و انتو بكرامه

 

و لا اسمع صوت خدامة تزف ياهل

 

فجأة الا صوت طق ( صوت الطراق لا صار عالويه او الجسم )

 

و أكثر من طراق

 

الياهل قعد يبجي

 

و هي تقوله بس اسكت … ابوك !

 

انا عور قلبي حده الياهل و صج سكت , يوم طلعت ما شفت احد او يمكن هي كانت بس لأني مو متأكده

 

و لا كان بخاطري ازفها و لا اروح اشوف وين معزبتها و اقولها

 

طلعت شفت خدامة و معاها ياهل تقريباً عمره 9 شهور تغير له

 

و ليلحين مو متأكدة هي و لا لا

 

حسبي الله عليها و على كل خدامة تسوي جذي بعيالنا

 

:’(

 

6-

 

امي اليوم شرت سلحفاتين و 4 عصافير

 

حطت السلحفاتين بطشت كبير  و وحده منهم انحاشت , الحين انا خايفة بالله دخلت غرفتي و فجأة الا صاعده سريري و

 

هي على راسي ؟؟؟؟ علماً ان طولها 3 سانتي او 4 :$ :$

 

 

و مممم , بس هذي احداث اليوم =)

 

عاد عندي سالفة و لا لا الله اعلم :p

 

بس انا اكتشفت ان اذا ماراح ادون الا اذا عندي سالفة ما ارح ادون ابد !

 

عشان جذي بدون و الي يطلع معاي